مابين 800 ألف سنة لحد مليونين سنة “..
لا تستغربوا من هالعنوان المدهش والغريب..!!!!!!!!!
هاد موضوع رسالة الدكتوراه في التاريخ اللي فكر يعملها فابيو..ومينو هاد فابيو ؟؟؟ ..رح خبركن..
فابيو طالب دراسات عليا سويسري قرر يعمل رسالة الدكتوراه بهالموضوع عنا ببلدنا..بتدمر ..ب تل الكوم.. وباشراف البروفسور جان ماري لو تانسوريه (مدير معهد عصور ماقبل التاريخ وعلوم اﻵثار بجامعة بازل السويسرية .. وهو رئيس البعثة السويسرية للتنقيب عن اﻵثار بسوريا ببادية تدمر )..
واستنفرت كل الدولة السويسرية منشان هال فابيو .. وبعتوه لعنا عا سوريا بسنة 2006 ليعمل دراساته وأبحاثه ..واجا فابيو هو وشي 5 طلاب دراسات والتحقوا بالبعثة السويسرية اللي كانت عم تشتغل بحوضة تل الكوم التابعة لتدمر ..وبعد كم شهر اجا وزير الشؤون الداخلية (مو السوري ها) السويسري شخصيا يزور سوريا ليطلع على حسن سير العمل والدراسة والبحث والتنقيب وأبدى إعجابه بأعمال البعثة السويسرية ووعدن يأمنلهن تمويل منشان يقدروا يتابعوا أعمال التنقيب.. (علما انو البعثة السويسرية وكل البعثات اﻷجنبية قاعدين بضيافتنا والدولة السورية مأمنتلن بيوت سكنية وكل احتياجاتن واذا مافي بيوت سكنية بأماكن التنقيب كانت الدولة تعمرلن بيوت خاصة الهن مع كافة مستلزمات العمل).. ومع هيك كانوا يتدللوا وينقوا (من النق يعني) ومايعجبن العجب ..واﻷنكى من هيك انن كانوا يهتونا انن عم يشتغلوا منشاننا (طبعا .. لهيك كانوا يخبوا بعض اللقى اﻷثرية وما كانوا يسمحوا للمرافقين السوريين انو يطلعوا على المعلومات والمكتشفات اللي يوصلولها بحجة انو ليتأكدوا منها..علما انو هالمرافقين هنن خريجين آثار ودكاترة وخبراء وبيحكوا 4_5 لغات ومانن قليلين بنوب) ..ولما طلاب اﻵثار والتاريخ طلبوا انو ينضموا للبعثة السويسرية ليعملوا تدريب عالبحث والتنقيب بالمواقع اﻷثرية ..رفضت البعثة السويسرية قال مافي تمويل..!! (قاعدين ببيتنا وبحضنا وبيشترطوا علينا وبيرفضوا يدخلونا عابيتنا )..فاعترضوا البحاثة السوريين وقالولن انتو بتجيبوا كل سنة مجموعات من الطلاب العديمي الخبرة من سويسرا لينقبوا معكن ببلدنا ..ونحنا رح نجيب طلابنا ليتدربوا ويرافقوكن بكل أعمالكن واذا ماعجبكن فيكن تتركوا وترجعوا عابلدكن… ومن يومها صار طلابنا يعملوا ستاجات (تدريب عملي) بكل المواقع اﻷثرية ومع البعثات اﻷجنبية….
آه صحي منرجع لفابيو… واتخرج فابيو ونال درجة الدكتوراه على بحثه أهم عمليات التصنيع بسوريا بالعصور القديمة … وعمل محاضرة ومعرض لمكتشفاته بحوضة الكوم ..قال لتعريف السوريين بالقيمة العلمية لهاﻹكتشافات اللي رح تغير قراءة التاريخ بالعالم….
هيدا شلي ..يعني حكي عالعالم … بس رح احكيلكن بعدين الحكاية الحقيقية العجيبة والغريبة عن حوضة الكوم بالبادية السوري…
وحييتوا يا سوريين…..