الجديد
الرئيسية / التراث اللامادي / كتبت الأستاذة #منال_ظفور Manal Zaffour..من حكايا سوريا والسوريين..حكاية ال ” مو طلاسم “والتقويم القمري واللي صار هجري والنسائين اللي كانوا يأخروا السنة عا كيف الحرب والغزو والآغارة….
كتبت الأستاذة #منال_ظفور Manal Zaffour..من حكايا سوريا والسوريين..حكاية ال ” مو طلاسم “والتقويم القمري واللي صار هجري والنسائين اللي كانوا يأخروا السنة عا كيف الحرب والغزو والآغارة….

كتبت الأستاذة #منال_ظفور Manal Zaffour..من حكايا سوريا والسوريين..حكاية ال ” مو طلاسم “والتقويم القمري واللي صار هجري والنسائين اللي كانوا يأخروا السنة عا كيف الحرب والغزو والآغارة….

من حكايا سوريا والسوريين..
حكاية ال ” مو طلاسم ”
والتقويم القمري واللي صار هجري والنسائين اللي كانوا يأخروا السنة عا كيف الحرب والغزو والآغارة….
و الأشهر القمرية وانتقالها للصحرا لتصير طلاسم غير مفهومة لاختلاف الإسم والمعنى عن الواقع الصحراوي الجديد ..
متل ماوعدتكن احكيلكن باقي خبرية ال مو طلاسم.. اللي هي اسماء الاشهر القمرية اللي رحلت مع القوافل صوب الصحرا وصارت بعدين الاشهر الهجرية..
كلنا منعرف ومنسمع بالتقويم القمري و الهجري والاشهر القمرية والهجرية.. بس يمكن معظمنا مابيعرف شو معاني هالأشهر و من وين اجت هالتسميات…
وبما انو الحكاية عن التقويم القمري والسنة القمرية.. خلوني خبركم كم شغلة ضروري نعرفهم.. متل كلمة سنة (عام) ومن وين اجت؟ سنة هي: شنتا= سنتا =سنة = من اسم القمر سن ٠٠ بالمناسبة بتعرفوا انو للقمر حوالي ال ٦٠ اسم.. رح اذكرلكن شي عشرة منهن. _ قمر _ سن _ يرح _ نانا _ ناشا _نن نار _ سيلينا _ تسيبي _ عجلبول_ انسون (لمن بيكون عمره اسبوع) _ تسبي باراي (لمن بيصير هلال)… طبعا غير الأسماء الحديثة_ هلال_ يزن_ بدر_ شهر…. الخ
والمعلومة المهمة اللي لازم نتذكرها.. هي انو بتقويم السنة القمرية اعتمدوا أجدادنا بحسابها على دورات القمر كونه مميز فلكيا فأعتقدوا أن حركة القمر هي حركة دائرية مغلقة بتضمن للطبيعة الخلود ومقومات استمرار الحياة من خلال العلاقة بين اله القمر (سن) واله الشمس (اوتو _بعلشمين) فكان القمر هو الأساس أو العراب لحساب الوقت والزمن.. فاخدت السنة القمرية اسمها من المدة اللي بيحتاجها القمر للدوران حول الأرض ١٢ مرة.. فحددوا السنة القمرية او الهلالية.. ومع كل ولادة قمر جديد كانوا يحددوا شهر فعرفوا اجدادنا الشهور حسب حالات القمر وحركته ومن خلال أشكال القمر ( من بدء اول ضوء ليصير هلال.. يزن.. بدر.. وبعدين نهايته باختفاء آخر ضوء..).. وطبعا راقبوا حركته بدقة فعرفوا انو القمر بينتقل يوميا حوالي ٨،١٢ درجة وبيرجع لموقعه الأصلي بين النجوم بعد تنقل بيشمل ٢٨ منزلة (مواقع النجوم) وسمو هالمنازل بأسماء منسمع فيها كتير بالقصائد الغزلية والادب.. متل : ( الثريا.. الفرقدين.. السماك.. السهيل.. الطرف.. الشولا.. النعائم.. العزى.. العيوق.. الإكليل.. الشعرى.. بنات نعش.. الجدي.. السعدى.. الطرف….السهى.. الخ).. وبناءا على هالتنقلات للقمر على منازله أعطوا الشهور القمرية اسماءها اللي بتعبر عن حالات معينة.. ومن ضمن هالأشهر كان في أربعة أشهر حرم (من أجل الطبيعة.. وهي أشهر مقدسة يمنع فيها ويحرم القتل والصيد والحرب وقطع الشجر ومن هون طلعت فكرة الصيام .. وعالاغلب هنن أشهر الربيع آذار ونيسان وايار ” ٣ سرد يعني متتالية” وواحد فرد بيكون شهر تموز).. بهدف إتاحة الفرصة لتكاثر الحيوانات ونمو النباتات ولإعطاء الطبيعة فرصة لتعيد توازنها وتجديد نفسها…
منشان هيك منعتقد انو اسماء الشهور القمرية عبارة عن طلاسم غير مفهومة.. بس اذا منفكر فيها شوي منكتشف انها اسماء بلغة سوريا القديمة شو مابدكن سموها (آكادية بابلية آشورية ايبلاوية كنعانية آرامية سريانية…. الخ) كلها اسماء لشعب واحد عاش عالارض السورية وتفاعل مع طبيعتها وبيئتها ومناخها وجوها وارضها.. فلاحظ وقلد الطبيعة واجتهد واشتغل وابتكر وابدع فخلق حضارات انسانية على امتداد الأرض السورية بحدود دولة جدنا سرجون الآكادي المعروفة… فالمراقبة والملاحظة والتجربة والتقليد والابتكار والإبداع حصل بنتيجة التفاعل مع البيئة المحيطة بالإنسان وهيك ابتكر من هالبيئة اسماء الأماكن وعناصر الطبيعة والزمن والنجوم والكواكب .. وهيك كان ابتكاره لاسماء الشهور بالتقويم القمري (حكيتلكن عنه سابقا بحكاية التقويم الشرقي).. بس رح ارجع ذكركن فيه.. كان التقويم القمري أول تقويم بيبتكره أجدادنا وكانوا يحتفلوا ببداية السنة الجديدة بأول نيسان بداية الربيع.. وبعد فترة اكتشفوا انو أشهر الربيع عم ترجع لورا حسب قراءته لحركات القمر.. وصارت تجي بالشتوية وبعدين بالخريف.. فاستنتجوا انو الطقس والمناخ بتتحكم فيهن منازل الشمس وانو دورات القمر ما الها علاقة وانو السنة القمرية ما بتتطابق مع السنة الشمسية واكتشفوا انو في فرق بينهن ١١ يوم.. َومنشان ترجع تتناغم الفصول اللي بتتحكم فيها منازل الشمس مع التقويم القمري قرروا إعادة صياغة التقويم القمري وعدلوه بإضافة ال ١١ يوم فرق.. بين نهاية آذار وبداية نيسان.. وصارت ايام ثابتة يحتفلوا فيها باعياد الربيع وراس السنة…
وقبيل الميلاد أخذوا قبائل الجزيرة العربية الرحل التقويم القمري بتسمياته الآرامية السريانية واعتمدوه كتقويم… وطبعا ما أخذوا التعديل عا لتقويم القمري… و منشان يتناسب التقويم مع مناخهم وبيئتهم صاروا يعملوا شي اسموا الكبس يعني صاروا يجمعوا الثواني والدقائق اليومية الزايدة ويجمعوها لتصير يوم او ايام.. لتصير شهر وبعدين بيضيفوها للسنة كل فترة سنتين او تلات سنين (يعني شي بيشبه السنة الكبيسة عند السوريين).. ومن هون طلع شي اسمه النساة = يعني التأخير وصاحب النساة هو منصب ديني.. فالناسىء او القلمس= هو رتبة شرف دينية وعلمية واجتماعية.. وكانت اهم وظائفه الرئيسية الي جانب الأفتاء بالشؤون الدينية.. انو كان يحسب للناس الحساب الفلكي. ويحاول يلحق الحساب القمري بالشمسي.. وكان الناسىء او القلمس يأخر اول السنة شهر كامل (مرة كل ٢ _٣ سنة) على حسب ما جمع وكبس من ايام ليصيروا شهر وبيضيف هالشهر على السنة الجديدة اللي بتصير ١٣ شهر بدل ١٢.. حتى ماتدور الشهور بالازمنة والفصول وليضل محافظ على حجهم و مواسمهم بوقت واحد من السنة.. منشان هيك كان يصير أخطاء فكانوا يحلوا شهر من الأشهر الحرم. يحرموا شهر من الأشهر الحل… وكانوا يعملوا هالشي لآتاحة الغزو والقتال ( يعني هيدا كان هدفهن من عملية التأخير او النساة… على عكس الهدف من التعديل اللي عملوه السوريين منشان تناغم الفصول مع التقويم بالطبيعة…
وبعد الميلاد قبيل الإسلام بالفترة اللي بيسموها المؤرخين( الجاهلية) اعتمد العرب التقويم القمري
بتسمياته الأصلية السريانية بعهد (كلاب بن مرة الجد السادس للنبي).. وطبعا حاولوا يطابقوا أسماء الشهور على حسب ما يتوافق مع بيئتهم و مناخهم والشيء المألوف عندهم بالجزيرة العربية..
وبفترة الإسلام اول مين اعتمد التقويم القمري كتاريخ وحولوا لهجري هو الخليفة عمر بن الخطاب على أساس احتساب يوم هجرة الرسول للمدينة المنورة ب ١٦ تموز عام ٦٢٢ م. واعتبر بداية السنة الهجرية بشهر محرم (اللي هو مؤتمر موجب نيسان) على اعتباره شهر حرم و فيه كانوا يقيموا مناسك الحج… وبعد فترة المسلمين صاروا يفضلوا انو تكون بداية السنة الهجرية بشهر رمضان…

وهلأ رح نتعرف على أسماء ومعاني الأشهر القمرية بأسماءها السريانية وكيف اترجمت بالجاهلية وكيف اتحولت لهجرية.
كانت السنة السورية تبدأ بالأول من نيسان بداية الربيع.. واول اشهرها :
_نيسانو.. نيسان ويعني البدء والتحرك والشروع والتفتح وفيه كانت تفتح بوابات السماء لتسطع الشمس بعد غيابها بالشتي..
_أيارو.. أيار ويعني الضياء والنور وزهر الربيع..
_سيمانو.. حزيران.. ويعني القمح. الحنطة والحصاد..
_دوموزو.. تموز.. اسم اله الخصب عند السوريين ويعني البريق واللمعان وكثرة نبات الأرض..
_ آبو.. آب.. ويعني شدة الحر وهو شهر الغلال والمواسم والثمار الناضجة..
_إلولو.. أيلول.. ويعني الصراخ والعويل والنواح..
_تشريتو..تشري قدمو.. تشرين١ ويعني البدء والشروع وكان اول شهور الخريف
_تشريتو.. تشري غراي (اللاحق) .. تشرين٢
_ آراكسلق.. كانون٢.. ويعني الثبات والاستقرار والمقصود فيه ظواهر فصل الشتاء..
_آراطبيثو.. كانون٢ وهو الكن والاستقراربالبيت بسبب توقف أعمال الزراعةبسبب العوامل الجوية القاسية.. وكانون يعني الشتاء وموقد النار..
_آراساباطو.. شباط.. ويعني الضرب والجلد وسبب تسميته من شدة البرد والرياح بهالوقت من السنة
_ آدارو.. آذار.. وهو آخر شهر بالسنة ويعني الصوت العنيف والقوي للعواصف والرعد بالشهر..
هيدي الاشهر باسماءها ومعانيها السريانية.. ومتل مو شايفين كلها بتتمحور حول الطبيعة والمناخ والأرض والخضرة. الزهر والربيع والمطر والبرق والرعد والخصب…
وهلأ رح نتعرف عالاشهر القمرية ومعانيها وكيف اتحولت واترجمت وصارت أشهر هجرية… ولا تستغربوا رح احكي شوي عامية (سرياني) وشوي فصحى(عربي) منشان تعيشوا بالجو.. وكمان لاتستغربوا عدم التمييز بين ع_ غ.. د_ذ.. ر_ ز.. ت_ ث.. الخ لان كانت الكتابة بحروف غير منقطة (يعني سرياني).. ولا تستغربوا كمان بعض التفاسير اللي بتحكي عن التلج والزهر بالصحرا والسبب عدم توافق المعاني والاسماء مع الأماكن ومناخها الطبيعي..
واول الشهور القمرية :
_ موجب.. مؤتمر.. الإمتثال لواجب متعارف عليه اجتماعيا.. واجا من تحريم ومنع الحرب والصيد وقطع الشجر ومنع اكل لحوم الحيوانات ومنتجاتها بأشهر الربيع لاتاحة الفرصة للطبيعة للتجدد والتكاثر واعادة التوازن..
و اتحول المعنى عند العرب حسب تفسيرهم بما يناسب بيئتهم. ومناخهم.. بانو كانت هالتسمية لانو العرب كانوا يأتمرون ويتشاورون فيه بقضايا وأمور السنة الجديدة.. وهو من الاشهر الحرم واول شهور السنة القمرية. ..
وصار اسمه بالتقويم الهجري.._ محرم : وهو اول شهور السنة الهجرية وفسروا معناه على اساس تحريم القتال والتجارة والصيد.. و لان العرب قاموا بغزو الجوار وفشلوا بتحقيق اهدافهم.. فحرموا القتال والغزو بهالشهر.. وبيقولوا كانوا محتارين بالشهر فمرة بيحللوه. و مرة بيحرموه..
_موجز.. ناجر.. ويعني شدة الحر.. وتفسير الاسم انو الإبل كانت تنجر فيه. يعني يشتد عطشها حتى تيبس جلودها..
وصار اسمه بالهجري _صفر : ومعناه الضوء والنور بالسريانية.. أما التفسير بالعربي فيعني الخلو.. يقال سمي كذلك لان العرب بعد الأشهر الحرم ينطلقون لشؤونهم للقتال و غيره وهو اول شهور الإغارة بعد الاحرام.. وكذلك خروجهم للبحث عن الطعام والقوت وهروبهم من الحر ويتركون بيوتهم خاوية.. صفر.. ويقال لأنهم كانوا يغزون القبائل فيتركوا من لقوا صفرا من المتاع..
_مورد.. خوان.. ومعنى الاسمين هو الأسد.. والتفسير العربي يقال جاء الاسم من الخيانة ويقال ان حادثا مشؤوما للعرب وقعت فيه خيانة. كانت السبب في التسمية..
وصار اسمه بالهجري.. _ربيع الأول. وهو الشهر الثالث بالتقويم ويقال سمي كذلك لانه يأتي بالربيع وان العرب كانوا يحسبون فيه ما أصابوا من أسلاب في شهر صفر ولأن القتال كان يشتد فثضيع الخيانة أحوال وتذهب أرواح.. ويقال أيضا سمي كذلك لان الأرض كانت قد اربعت وامرعت اي خصبت.. والارتباع هو استقرار الناس بعد الغزو..
والحقيقة ربيع يعني المطر والعشب والزهر
_ملزم.. وبصان.. بصان.. ويعني بريق ولمعان الشمس .. و بمعنى تاني هو الوعاء اللي بيصون وبيحفظ الأشياء..
وصار اسمه بالهجري ربيع الآخر وفسروا الاسم.. يقال الارتباع عند العرب هو الآقامة في عمارة الربيع..
=مصدر.. سماح.حنين.. . حنتم : ويعني السحابة السوداء.. حنين يعني الشرف.. أما التفسير العربي
جاء من حنين الناقة أي مدت صوتها شوقا لولدها.
وصار بالهجري اسمه _جمادى الأولى وأخد هالاسم لانو بيجي بالشتي لمن بيتجمد الماء من شدة البرد. و الزمهرير وكانوا يسموه شيبان لبياض التلج فيه (قلتلكن لا تتعجبوا)..
_هوبر.. زباء.. ورنة.. و الزباء تعني امرأة قاتلة.. والحقيقة تعني الخصيبة.. ورنة يعني كثير التدهن والتنعم…
وصار اسمه بالهجري.. _جمادى الآخرة هو الشهر السادس.. ويقال سبب تسميته لشدة البرد بشمال الجزيرة العربية (يعني جنوب الهلال الخصيب السوري) وكانوا يسمونه ملحان لبياض الثلج فيه (كمان لا تتعجبوا)..
_هوبل.. الأصم ويعني الصامت الهادىء.. ويقال سبب تسميته لعدم سماع صوت. قعقة السلاح فيه ولا صوت لمستغيث ولا حركة لقتال.. لانه من الأشهر الحرم..
وصار بالهجري اسمه.. _رجب ويعني هاب وعظم وبمعنى آخر هو دعم الشجر كيلا ينكسر من حمل الثمر.. وهو الشهر السابع وكانوا يسموه مضر على اسم قبيلة مضر وذلك لأنهم كانوا يوقعوا الشهر بوقته لا يغيروا موقعه كما كانت تفعل العرب حسب حالة الحرب والغزو..
_موهان.. عادل.. عاذل..ويعني المنصف.. و التسمية قائمة على فكرة الدفء و الحر (يعني الشوب مو شي تاني ها) لانو الطقس بهالشهر بيبلش يدفا. ويعتدل..
وصار بالهجري اسمه.. _شعبان ومعناه جاء من التشعب والتفرقة.. يقال ان العرب كانت تتشعب فيه اي تتفرق للحرب والإغارات بعد قعودهم في شهر رجب فسمي كذلك لما تعبت القبائل واقتسمت وكونت شعوبا أو بسبب تشعب الناس وتفرقهم لطلب الماء.. وكانوا يتفرقون قاصدين الملوك لإلتماس وطلب العطية والطعام…
_ديمر.. نافق.. ناتق.. وديمر يعني النتاج الكثير.. ونافق وناتق من نفس الجذر وتعني الخروج.. الهز.. الجذب.. النفض.. كثرة الإنتاج والأولاد.. وكان هالشهر يجي بموسم النتائج فسموه تيمنا حتى تكون انعامهم جيدة النتاج…
وصار اسَمه بالهجري.. _ رمضان.. من ارماض الأرض من شدة الحر. ومعناه السخونة الشديدة للشمس.. ويقال رمضت الحجارة اي سخنت بالشمس ويقال رمضت الفصائل الجمال أي عطشت من شدة الحر… وسمي بهذا الاسم لانه جاء بفترة كانت شديدة الحرارة.. وبالإسلام اخذ معنى حرق الذنوب.. (مع انو ممكن يجي رمضان بالشتي و البرد)..
_دابر.. واغل.. وعل.. الواغل هو اللي بيشارك القوم بطعامهم من غير دعوة منهم.. وعل.. وغل من جذر واحد. ومعناه الدخول والايغال.. و بالعربي وعل هو غزال تيس الجبل… أما المعنى الحقيقي فهو الرجل الشريف المقدام..
وصار اسمه بالهجري.. _شوال.. وهو الشهر العاشر وبيحتفلوا باوله بعيد الفطر كنهاية لصوم رمضان..
أما معنى شوال فهو ارتفاع الحرارة اللي بتسبب الجفاف والنقصان.. والتشويل هو جفاف ونقصان لبن الإبل.. وبمعنى ثان يدل على الإخصاب والتكاثر.. يقال شالت الإبل أذنابها استعدادا للتكاثر والتناسل والطرق…
_حيفل.. هواع.. ورنة.. هواع هي أنثى الحرباء ويقال سمي كذلك لأنه شهر القعود والاستقرار لقعود العرب بمنازلهم بعد الغزو والصيد والقتال..
وصار اسمه بالهجري.. _ذو القعدة.. وهو اول الأشهر الحرم.. الشهر الذي يسبق الحج.. ويعني القعود. الكف عن القتال ولقعود العرب في رحالهم عن الغزو والميرة وطلب الكلأ.. وله معنى ثان هو القاعودات. القعود وهو ابن الجمل…
_مسبل.. برك.. من البركة والتبرك و كان عيد مقدس ويعني الركوع. والجثو حتى الركب..
وصار بالهجري اسمه.. _ذو الحجة وهو ثاني الاشهر الحرم.. وآخر الأشهر المعلومات.. وكانوا يسموه أيضا نعس وبرك من بروك الإبل يوم النحر ولانه من الاشهر الحرم لا تستحل فيه الحرمة يعني ( المرأة) ولا يباح فيه القتل… هيدي أسماء الأشهر الهجرية وكيف أخدت معانيها من البيئة المحيطة واتمحورت كلها حول الحر والجفاف والقحط والغزو والآغارة والحرب والحلال والحرام والابل والنوق ..
هيدي هي حكاية ال مو طلاسم..
حييتوا يا سوريين. تحيا سوريا…

ربما تحتوي الصورة على: ‏‏‏‏هاتف‏، و‏نص‏‏ و‏نشاطات في أماكن مفتوحة‏‏‏

ـــــــــــــــــــــــــــــــــــــــــــــــــــــــــــ

‏٨ مايو‏، الساعة ‏٧:١١ م‏

بتقول ابيات الشعر :
شهور ثمود موجب ثم موجر..
ومورد يتلو ملزما ثم مصدر…
و هوبر يأتي ثم يدخل هوبل..
وموهاء قد يقفوها ثم ديمر..
و دابر يمضي ثم يقبل حيفل..
ومسبل حتى تم فيهن أشهر…
هالكلام الغريب مو طلاسم..هي أسماء الأشهر بالسنة القمرية اللي
طلع منها الأشهر الهجرية…
بكرا بحكيلكن باقي الخبرية..