Haitham Almoghrabi
صرلي فترة ماحكيت بالتصوير ولا عملت فيديوهات حقكن عليي بس ظرف و بإذن الله بيعدي
بس اليوم حابب قول كلمتين
خلال فترة نقاهتي قعدت اكثر عالنت و قريت و شفت كتير قصص ….
شفت انو بعد عشر سنين اسى و حزن و الم … ماحنينا على بعض و لا تكاتفنا بالعكس تباعدنا كتير …. كتير
بس رح ضل بمجال التصوير و اختصر فيه حالنا بكل المجالات …
الكل شغال بالكل و الكل عم يحكي عن الكل و هاد بيغمز و هداك بيلمز و متل الطابة كل حدا بيشوطها للتاني ….
خليني قلكن كلمتين خفاف نضاف
زميلك اذا كان بخير فإنت بخير لأن لما كل المصورين بيتكاتفوا بيبطل حاد بياكل حقهن و بيبطل حدا يتشاطر لأن الكل خلص عمل بريستيج معين للمهنة و بروتوكول عمل … و هالشي بيبدأ من كل حدا فينا ما نرميها على الغير و نقول والله نزعوا المهنة والله ولاد او او …. خلينا نبدأ نحب بعض بالأول و نوثق بشغلتين
أولا – رزقكم مكتوب و ماحدا بياخد لقمتكم و رزقكم مو بشطارتكم رزقكم من عند الله
ثانيا – كونوا واثقين بأنفسكم و بتميزكم و لاتقلدوا حدا ولا تلحقوا تريند خلي عندكن كاراكتر خاص فيكن خلي اللي يشوف صورة يقول هاد ستيل فلان و هاد تعديل فلان و هي بوزات فلان …. حلو التميز الله خلقنا كل حدا فينا اله شكل و نفسية و اسلوب حياة … لا تتحولوا لقطيع و لما بيكون الك ستيلك الخاص و بتتمرس فيه و بتصير فيه شيخ كار ماعاد حدا ينافسك بمجالك….
حبوا بعض و اتعلموا في اساتذة كتير بتحب تنقل المعلومة دوروا عليهن و لاتنصدموا اذا حدا طلع مريض نفسي انسوه و تابعوا بحثكم عن العلم و المعرفة و الفن و صوروا و جربوا حتى تتقنوا ..
موفقين و كل الحب