كتب الشاعر ‏#بحر_ العرب‏ ..قصيدة بعنوان #بالشام .. في شوية حكي .. عم ينحكوا عالصبح ..- مشاركة: ‏‎Salman AlAhmad‎‏

موال صوت القمح ..

في وشوشة نحلة و زهر ..

فيروز عم تفرش عطر ..

عَ كتاف حارة معتّقة ..

و الغيم مارق سَروقة ..

يروي الأرض حب و مطر ..

تايندمل هالجرح ..

بالشام في شوية حكي ..

عم ينحكوا عالصبح ..

……………..

بالشام في ريحة حلب ..

بالزعتر و بالغار ..

و حجار صفرا من دهب ..

تحكي عَ يلي صار ..

شهبا بعينيها الطرب ..

و الجار خي الجار ..

بالشام مرسومة حلب ..

متل الخبز و الملح ..

………………

بالشام في حكاية وعي ..

بتبلش بعشتار ..

من موج عم يغزل سعي ..

تا يِكمل المشوار ..

و ساحل قَرا عمسمعي ..

إلياذة الأشعار ..

بالشام هايج هالبحر ..

حرفو جمع مع طرح ..

……………

بالشام في حمص الحِدا ..

و هونيك (بابنيان) ..

قانون من وقت البِدا ..

و ال(واضعو) انسان ..

مجدول حلمو عالهدا ..

تا يِرسخ العنوان …

بالشام مغروسة حمص ..

متل و كإنّا صرح ..

…………….

بالشام في كمشة حجل ..

لونن بلون الريح ..

حوران سهلا والجبل ..

صوتن صلا و تسبيح ..

(فيليب) عم يبرق أمل ..

و كفوف بالتلويح ..

بالشام جولان البطل ..

صامد رغم هالجرح ..

………………

بالشام في دير الشمس ..

و في تدمر الحرة ..

من الشام للرقة عرس ..

و زنود مِسّمرة ..

قامشلي بيكون الحرس ..

لو هالعدا تِجرّا ..

و بالشام كل شقفة أرض ..

تحكي عَ يلي صار ….

و بالشام في شوية حكي ..

عم ينحكوا .. عالصبح ………………

بحر العرب