الصديق الوفي…!
قصيدة شعبية
شعر: مسلم الطعان

الإهداء: الى صديق الطفولة والشباب و الكهولة الأخ الحبيب محمد برنجيه المحترم.

لو رايد إتدور الوفا و ماضيّه
إسألْ عليهْ محمد برنجيّه….!

محمد وفي و مايوم يخلفْ وعده
عطر الوفا بگلبه تحسده الورده
إيعزْ الصديق هوايْ أعزْ من ولده
أبيضْ گلبْ محبوب صافي النيّه
لو رايد إتدور الوفا و ماضيّه
إسألْ عليهْ محمد برنجيّه…!

نفسه كريمه و طيبته عنوانه
و طبعه شهم ما يوم ذم صحبانه
يفرش الروح إفراش لجل إخوانه
و عنده (الهلا ) خبزة وفا و حنيّه
لو رايد إتدور الوفا و ماضيّه
اسألْ عليهْ محمد برنجيّه…!

محمد لذيذ و طيبه صافي المنبع
من لذته لا لا أبد ما تشبع
يشعر بجرحك گبلْ لا تتوجع
مثلْ الطبيب إيضمدكْ إبحنيّه
لو رايد إتدور الوفا و ماضيّه
إسألْ عليهْ محمد برنجيّه….!

طبعه ظريف و روحه كلش ترفه
دمه حلو و معروف عنّه الخفّه
بس جيبْ إسمه الناس كلها إتعرفه
و سوالفه إتنگط عسلْ يوميّه
لو رايد إتدور الوفا و ماضيّه
أسألْ عليهْ محمد برنجيّه….!

صاحب شهامه و كلكم تعرفونه
لليْ يگصده ينطي ماي إعيونه
مو بس صباح و ناهض يحبونه
مسلم يودّه إوْ يلهج بطاريٌه
لو رايد إتدور الوفا و ماضيّه
إسألْ عليهْ محمد برنجيّه….!

الثلاثاء الموافق 13/5/2025
الساعة الرابعة فجراً
مدينة الفقراء
الناصريه

* الصورة مع الأخ المحتفى به شعرياً محمد برنجيه في بساتين الفضلية بعدسة الأخ و الصديق الحبيب الدكتور ناهض الماجد المحترم .