Manal Zaffour
العامية المحكية
يحرء حريشا..نفدت بريشا..
بتعرفوا يا سوريين انكن بتحكوا لغة عامية عمرها بس 7000
سنة..وهاللغة.اللهجة العامية المحكية هي خليط من السريانية واﻵرامية و اﻷوغاريتية والكنعانية واﻵشورية..وغيرها من اللغات اللي خلقت بمنطقة سوريا الطبيعية واتطورت مع الزمن وطبعا دخلت عليها العربية بالقرن السادس ق. م (600 سنة ق.م) وطغت على لغة الكتابة و التدوين.لكن لغة التخاطب بقيت هي لهجتكم المحكية بكل تنوعاتها البيئية وموسيقاها الجميلة..
ومتل ما منعرف كلنا بإنو أول و أقدم أبجدية بتاريخ الحضارة هي اﻷبجدية اﻷوغاريتية (المسمارية) واللي كانت نواة اللغات
(اللهجات اذا صح التعبير) اللي اتطورت وخلقت بمنطقة سوريا الطبيعية (سوريا سرجون اﻵكادي)..والمسمارية انقسمت كلغة تدوين إلى :مسمارية حورية (بأوروك =اﻷرض المنخفضة= العراق ومناطقها) و مسمارية آكادية (ببرعو شمايو =أرض السما =بلاد الشام ومناطقها) وكانت عبر العصور تتصدر لغة وتسيطر حسب القوة والوضع السياسي واﻹقتصادي والثقافي يالمنطقة وبالتناوب ..فبرزت السومرية والبابلية والعمورية واﻵشورية واﻵكادية و الكنعانية واﻷوغاريتية واﻵرامية والسريانية والفينيقية..والعريية.. (بعرف عم تستنوا اذكر العبرية ..اي مافي لغة عبرية ﻷنها عبارة عن سرقة كاملة من الكنعانية وحروفها سرقة من اﻵرامية)..
بما انو كانت سوريا الطبيعية (سوريا سرجون) هي مركز تجمع أقدم حضارات بالتاريخ فطبيعي انو الدول الناشئة والمحيطة بسوريا بهداك الزمن انو تتأثر وتتحين الفرصة لتاخد وتسرق وتنسب الها شو الله يسرلها من هالحضارة بوقت ضعفها متل التراث المادي واللامادي وكل مجالات الحياة وعلى راسها العلوم واللغة اللي هي الحامل ﻹرث وتراث وتاريخ اﻷمة..
مابدي ادخل باشكالية اللغة العربية (اللي بعشقها متل ما بعشق السريانية واﻵرامية)..بس كونوا واثقين من شي واحد وأكيد وهو انو اللغة العربية هي اﻹبنة المدللة وليدة هاللغات القديمة يعني أصلها وفصلها اجا من هون..رح اذكر أمثلة صغيري عاكلامي: أناجيل العهد القديم وأول نسخة مدونة للقرآن والوحيدة (القرآن غير المنقط ..موجودة بمتحف اللوفر_باريس) كانت مدونة بالسريانية واﻵرامية .وما زال الكتير من الكلمات والمفردات السريانية واﻵرامية موجودة بالقرآن..وللأسف مامنعرف معانيها …
مثال تاني :سيبويه الفارسي واضع قواعدالعربية ونظم للنحو والصرف لغيرالعرب (بعد دخول الشعوب المتنوعة باﻹسلام) وكل كلمة سرياتية آرامية ما انضبطت مع قواعده اللي حطها لغير العرب سماها أعجمية ووجد أسماء سماها ممنوعة من الصرف ﻷنه ماوجدلها جذور بقواعده ..مع انو هو فارسي وما ممكن يكون أفقه وأفصح باللغة العربية أكتر من أهلها…والحقيقة انو واضع النقاط على الحروف اﻷصلي العربي هو أبو اﻷسود الدؤلي وواضع علم النحو الحقيقي اللي نسيناه واعتمدنا بس عاسيبويه..
وكانت السريانية واﻵرامية مازالت سائدة بالعصر اﻹسلامي لعهد الدولة اﻷموية .لحد ما أعطى عبدالملك بن مروان اﻷمر بتعريب الدواوين والمخطوطات والكتب وكل مراكز الدولة..وبقييت فقط لغة التخاطب بين الناس..
فثقافة الهلال الخصيب (الرافدين وبلاد الشام) بعامة…ويلاد الشام بخاصة هي حصيلة امتزاج هالثقافات التاريخية اللي شكلت هويتها الحضارية…
هاللهجة المحكية ما انهد حيلها عامدى العصور رغم كل ما اتعرضتلو المنطقة من أزمات وحروب وغزوات وفتوحات واحتلالات ووصايات وحمايات..(وحيلها يعني عزمها وقوتها..حيل=حايلو بالسرياني يعني العزم والقوة)..
ويحرء حريشا هاللهجة نفدت بريشا..
(حريش=هي حشرة أم أربع وأربعين اسمها بالعامية السريانية حريشو..وهالحشرة اذا بتقرب عاﻹنسان بتعملو مشاكل وحساسية ومنها طلعت بيتحرش=بيعمل مشاكل..ويحرء حريشك هي دعوة بحرق اﻷعداء والمشاكل وكل مين بيتحرش بهالشخص)..أما انها نفدت بريشا فهي (ريشو..ريشا آرامية سريانية تعني الرأس..ونفد=يعني استطاع الهرب من أمر أو مشكلة..ريشه=رأسه..فنفد بريشو=أنقذ رأسه..ونفدت اللهجة بريشا=حمت حالها..)…
وهلليلويا (سبحو الرب) يا سوريين..ومعلش (ما عليه شي) ما تخجلوا من لهجتكن بكل موسيقاها ونغماتها..ليكو (شوفوا) في
مين عم يقول انو لغتكن ماتت واندثرت وما بتستاهل انو نحييها
أو ندرسها بمدارسنا وجامعاتنا..بس (لكن) في لغات تانية عمرها ما بيتجاوز ألفين سنة عم تتدرس وتحيا ببلدنا متل (الفارسية والكردية والعبرية..وغيرها)..فمابدنا غير معاملة بالمثل ونطالب بعودة لغتنا رسميا لحياتنا..بلكي (بيجوز)نقدر نرجعلها مكانتها ومركزها الحقيقي..
ويا لهجتنا العامية ياقربان عيوننا (يعني دخيل الله اللي خلقها)
وحوبى وفشر بعينو كل مين بيقول عنك لغة ميتة..
(حوبي=سريانية يعني مذنب..فشر=يعني كذب ..الكذب يبدو على ملامح الوجه فورا وخاصة بالعيون ..ففشر بعينو يعني الكذب باين بعيونو..)..
هي بعض الكلمات اللي منستخدمها يوميا بلهجتنا العامية ..يمكن ما منعرف انو الها اصل ومعنى …
والكلام عن اللغات القديمة طويل جدا جدا ومهم انو نطلع عليه
وهيدي كمان حركشة لحتى تتشجعوا تتطلعوا وتتعرفوا عا لغاتنا القديمة الجميلة…..
سوريا اﻷصيلة ولهجتها المحكية كانت الوسيلة اللي بينتلنا حقيقة كنوزنا المدفونة وكشفتلنا التحريف والتزوير اللي صاب حضارتنا وخلتنا نقرأ تاريخها الحقيقي العظيم …
فيا سوريين لا تستهينوا بتاريخكن وحضارتكن ولا تخلوا طاقاتكن وقدراتكن تضيع بالخلافات..وكونوا متل ماكنتوا سوريين بكل شي لتحييا سوريتنا…وطوبى لجميعكن…وتحيا سوريا..