سالفادور دالى
سالفادور دالي (11 مايو 1904 – 23 يناير 1989) رسام سوريالي اسباني من كاتالونيا بيعتبر واحد من اهم الفنانين فى القرن العشربن و مشهور باللوحات الرائعة الغريبة و اللى رسمها بطريقة مميزة بتخليها اقرب للاحلام منها للواقع.
من اشهر لوحاته اصرار الذاكرة و اللى كمل رسمها سنة 1931 و هى معروضة دلوقتي فى متحف الفنون الحديثة فى نيويورك بس لسته مهاراته بتضم كمان النحت، الافلام و التصوير. دالي كمان عمل فيلم كرتون قصير بالتعاون مع والت ديزني الفيلم اسمه ديستينو و اترشح لجايزة الاوسكار بعد ما اتكمل سنة 2003.
دالي كان دايما بيصر انه من اصول عربية و ان جدوده من شمال المغرب و جم لاسبانيا مع الغزاه اللى احتلو اسبانيا لمدة 800 سنة. الادعاء دا مالوش اى دليل بيدعمه و ممكن يكون جزء من الدعاية اللى كان بيعملها لنفسه لانه كان دايما مشهور بحبه لكل شيئ غريب و مش عادي و احيانا شخصيته المثيرة كانت بتثير الاهتمام اكتر من اعماله الفنية وبيخلي الناس دايما تتكلم عنه و مبيعات لوحاته بتزيد.