لا يتوفر وصف للصورة.
ورشة سينما
١٢ سبتمبر ٢٠١٤ ·
دروس أفلام تسجيلية
عناصر الصوت في الفيلم التسجيلي
*
زى ما وعدنا اننا هنتكلم عن الافلام التسجيلية فانا آثرت اني ابدأ بشرح شيء مهم جدا في الفيلم التسجيلي وهوا عنصر الصوت ويمكن هوا من اهم الاشياء اللي بيوقع فيها كتير من صناع الافلام التسجيلية
**
عناصر الصوت في الفيلم التسجيلي
1- الصوت خارج الكادر
Voice over””
التعليق الصوتي على الفيلم
وهوا المعادل الصوتي للصورة
ممكن يأديه معلق صوتي من صُناع الفيلم
او ابطال الفيلم بحيث يكون مجرد معادل صوتي لصورة على الشاشة مش لازم تكون صورة الشخص اللي بيتكلم او ربما تكون صورته لكن صوته مجرد ناريشن
التعليق الصوتي في الفيلم التسجيلي ممكن يكون موضوعي محايد او يعبر عن وجهة نظر صناع الفيلم ودا بيكون على حسب مضمون الفيلم
التعليق الصوتي برضو ممكن يكون تعليق درامي تمثيلي
ودا غالبا بيشارك فيه اكتر من معلق
التعليق بيكون فيه حوار بين المعلقين سواء بشكل مناظرة لو كل واحد ليه وجهة نظر مخالفة وممكن المعلقين يكونوا بنفس وجهة النظر فيكون الحوار بيدعم بعضه
او ممكن يؤديه معلق واحد برضو بطريقة درامية زى مثلا فيلم وصية رجل حكيم في شئون القرية والتعليم إخراج داوود عبدالسيد
الموضوع عن التعليم في احد القرى فالمعلق بيتخيل حوار بين احد المثقفين وبعض اصحاب العقول المتخلفة فبيغير صوته واداءه بحيث بيتقمص الشخصيات المختلفة دي
وممكن يكون بطريقة مباشرة ما فيهاش تمثيل او دراما مجرد معادل صوتي للصورة
الفويس اوفر لو باللغة العربية ممكن يكون فصحى او عامية
ممكن يكون بطريقة مباشرة او درامية
ممكن يكون بطريقة جادة او هزلية
ممكن يكون محايد او بيعبر عن وجهة نظر
ممكن يكون مبسط جدا او مختص لقئة معينة وممكن يكون بطريقة شاعرية او ربما يكون شِعر او حتى اغنية ودا على حسب المضمون
ممكن يكون معادل صوتي للصورة بحيث الكلام يشرح الصورة ,او ممكن يكون مكمل صوتي بحيث لو في صور معينة عجز المخرج انه يظهرها على الشاشة فيكملها بالصوت .
*
2- الصوت داخل الكادر
ممكن يكون صوت طبيعي للمشاركين في الفيلم كنوع من اظهار حياتهم الطبيعية
بحيث يظهر نوع من انواع التفاعل داخل الفيلم زى حوار بين ابطال الفيلم
ودا ممكن يكون طبيعي ف حالة ان الفيلم واقعي , او تمثيلي لو الفيلم دراما تسجيلية بحيث ان ابطال الفيلم ممكن يكونوا واقعيين بالفعل او هما نفس الاشخاص اللي بيتكلم عنهم الفيلم لكن بيعيدوا تمثيل حاجات حصلت في الماضي او الاستعانة في الفيلم بممثلين محترفين زى الافلام الوثائقية اللي بتكون عن عصور قديمة جدا او شخصيات تاريخية مثلا
Docu- drama
الاداء التمثيلي احيانا في افلام الدراما التسجيلية ممكن يوصل ان الممثلين جوا الفيلم يعملوا ميكس بين التمثيل للموضوع اللي بيتكلموا عنه وبين التقديم البرامجي بحيث يعرضوا الموضوع بنفسهم ادام الكاميرا تمثيليا ويتوجهوا بنظرهم للكاميرا يشرحوا الموضوع مثال على كده فيلم ليبيدو إخراج يوسف الامام او فيلم مذكرات شاعر نحنوح إخراج هشام عباده
التقارير
الفيلم التسجيلي ممكن يعتمد على التقارير او الحوارات
ودي في الاصل اسلوب ريبورتاج تليفزيوني
بينقسم لتقريرو او حوار امام الكاميرا للمشاركين في الفيلم او ابطال الفيلم
بحيث يتكلم ادام الكاميرا بصوته وصورته عن حياته او يشرح الموضوع اللي بيتكلم عنه الفيلم
ممكن يكون قاعد في حالة سكون وبيشرح الموضوع وهوا بيبص للكاميرا
او يكون بيتكلم وهوا بيتحرك ويششتغل بحيث يكون كلامه متفق مع الحاجة اللي بيعملها
الفوكس بوكس : حوار مع مسئولين او مختصين بالنسبة لمضمون الفيلم
الساوند بايت:تقارير مع ناس عادية او من الشارع لو الموضوع عام ومتعلق بفئة كبيرة من الناس
المؤثرات الصوتية زيها زى الفيلم الروائي ممكن تكون مؤثرات طبيعية او صناعية
واخيرا الموسيقى ودي طبعا شيء مهم جدا ومش محتاج شرح
والصوت في الفيلم التسجيلي عنصر مكمل للصورة فلو الصوت طغي على الصورة هيبقى كده بناء الفيلم التسجيلي اتكسر واتحول لقالب تاني
وللموضوع تكملة
Hussein bashandi