حكاية زهرة شقائق النحمان..ايه النحمان مو النعمان..
النحمان من فعل نحم السرياني يعني انبعث…احيا..قام من المون.. شقائق يعني شبيهة الريح بليونتها وصفاتها الناعمة…((شقائق النحمات يعني زهرة القائم من الموت))…
الحكاية…
اقتباس من اسطورة عشتار وعقيدة الخصب السورية…(صراع بين آلهة الحياة وآلهة الموت على اله الخصب)…..
….ووقعت عيون أريشكيجالا الهة الموت وسيدة العالم اﻷسفل…على تموز اله الخصب اللي كان عم يتجول بالغابة لبث روح الخصب بين الكائنات…وأغرمت فيه أريشكيجالا وحبت تحتفظ فيه لنفسها..فبعتتلو خنزير بري عالغابة.. ولما شافو تموز حاول مواجهته بشجاعة..لكن الخنزير البري هجم عليه بقوة وعضه بفخذه وغرز قرنه بأسفل بطنه..فوقع تموز وصار يتلوى فوق اﻷرض محتضرا على التراب.. وبلغت آناته وصرخات ألمه أسماع عشتار آلهة الحياة وسيدة النور اللي كانت بوسط السما على عربتها الشمسية عم تعمل جولتها اليومية لتتفقد مخلوقاتها على اﻷرض… فالتفتت فجأة واتجهت نحوه بسرعة (تفسير غياب الشمس المفاجئ وتبدل الطقس في ايام الخريف ) ولمحته من بعيد غرقان بدمه و غايب عن الوعي..فصرخت صرخة مدوية اهتزتلا اﻷرض (صوت الرعد)وتطاير الشرر والغضب من عيونها. (لمعان البرق)..ونزلت لعنده وشقت ثوبها عند صدرها وشدت شعرها وصارت تضرب صدرها بايديها و تجوح وتنوح وبلشت تضرب اﻷرض برجليها لتفيق وتزعج آلهة العالم اﻷسفل أريشكيجالا وتلومها (من هون بدأ الرقص والدبكة…بخبط الرجلين عالارض ).. وصاحت فيها وقالتلا:
لا ما رح يخضعلك كل شيء ورح يبقى تموز اله الخصب الاله القتيل ذكرى حزن خالدة لﻷبد… ورح يمثلو مخلوقاتي مشهد موته كل عام ليذكرك بنواحي وبكائي وحزني .. ورح تنبثق زهرة من دماء تموز .تتفتح بمتل هاليوم من كل عام لتذكرك يا أريشكيجالا بفعلك الشنيع وتعذبك لﻷبد ….
و رمت عشتار تعويذتها وصبت على دم تموز المجبول بالتراب..رحيق زهرة عطرة ولما لامست دم تموز بلش يغلي ويفور وتصاعدت منه فقاعات صافية وانبثقت زهرة بلون الدم تخفي بذورها تحت وراقا…بس هالزهرة عمرا قصير ﻷنها رقيقة ساقها ضعيفة بتعصف فيا الريح اللي عطتها اسمها وهو ( شقائق النحمان)
وكل ما ناحت ولطمت وندبت عشتار على اﻹله القتيل ..قدر (كتب..فرض) على النساء السوريات أنو يعملو متل عشتار…ويرقصو رقصة الحزن وينوحو ويجوحوا متلا ويصرخو : يا أيلي.. وا وايلي.. يعني: يا الاهي..وماحدا رح يفهم هالحكاية غير السوريين أبناء الشمس ..أبناء الحياة..
سوريا هي الايل..الاله القتيل..لانو أرضها تعبت وتمللت شقائق النحمان…ولهيك رح تقوم من الموت وتبعث عن جديد..وتنهض نحو السما …لتحيا وتحيا وتحيا سوريا…
يسعد صباحك….هده معلومة الويكيييديا بالضبط هي اللي استفذتني لاحكي الحكاية التاريخية السورية الاصلية لزهرة شقائق النحمان..اللي عمرها عالاقل 4000 سنة ق.م….
