حكاية صغيرة عن “حدد اﻹله”
وكان معبد حدد بدمشق (مكان الجامع اﻷموي..أو كنيسة يوحنا المعمدان ..أو معبد جوبيتر..الخ) من أقدم وأكمل وأهم وأجمل المعابد المبنية ببلاد الشام من آلاف السنين.. ﻷنو دمشق كانت مدينة حدد المفضلة (مدينة الله)..وهو أول اﻵلهة اللي سكنت دمشق ..فكان الها حرمة مقدسة مابيتجرأ حدا على انتهاكها أو انتقاصها ..وبقي المعبد مكرس للعبادة من آلاف السنين لحد اﻵن (يمكن هاد هو سبب الطاقة العجيبة وسر القدسية اللي منحس فيها بهالمكان) .. وتوالت عالمعبد بالعصور الحديثة (اليونانية الرومانية المسيحية واﻹسلامية) عبادات وأديان مختلفة بطقوس وطرق عديدة لكن بتودي ل إله واحد !!!!.. وكان حدد (القابض بإيدو على العاصفة وسنبلة القمح والماسك بإيدو التانية الفأس والسوط )..هو رب اﻷرباب و اله الطقس والصواعق واﻷمطار وبينزل الغيث وبينبت الزرع وبيوهب خيرات اﻷرض للناس.. كان يتجول بالسما بعربايته اللي بيجرها التور المقدس اللي بيسبب بزمجرته صوت الرعد اللي بيهز أركان الدنيا..وكان يجمع الغيوم ويجلدها بسوطه لحتى ينزل منها المطر… وكان يبدا بشهر تشرين جولاته ليصيد الغيوم..
وكانوا الناس بأثناء جولاته يحجوا ويطوفوا حول معبده بدمشق ليعطيهن اﻷمان وليتباركوا فيه قبل مايبدوا أعمالهن.. ويقدمولوا قرابينهم سنابل القمح أو الخبز والزيت والخمر..يعني ماكان يطلب ضريبة من الناس مقابل المطر والخير والزرع..
وإلا قلكن كان يطلب ضريبة وهي انو يزرعوا الناس شجرة او نبتة او وردة كل سنة لحتى مايغضب عليهن….شايفين ما أجمل هاﻹله وما أجمل طلباته!!!!..
الموريو حدد يسعي..مثقاداش شموخ ..
اﻹله حدد الساعي…تقدس اسمك..
