حكاية صعيرة عن الحرير..
بتقول اﻹسطورة الصينية انو بسنة 2700 ق.م أمر اﻹمبراطور الصيني هوان_جدي زوجته زيليتش بانو تحاول تعرف سبب تلف أشجاره المدللة بحديقته واللي هي أشجار التوت ( توسيه بالصينية القديمة ) (اللي قدملوا اياهن كهدية التاجر الكنعاني القادم من غرب آسيا) ..فنزلت زيليتش عالحديقة واكتشفت وجود ديدان بيضا عم تتغذى على أوراق شجر التوت ..وبعدين بتقوم الدودة بغزل شرانق لامعة.. وقامت زيليتش أخدت كم شرنقة لتفرجيهن لﻹمبراطور …(بالحقيقة وعلميا يعني في فترة زمنية بين التغذية والغزل بتضل دودة القز تتغذى على ورق التوت مدة اسبوعين وبعدين بتصوم وبتبدا بغزل الشرانق..بس هالزيليتش سرعت الزمن شوي)..
وعلى طاولة الشاي (بلشت الصدف العجيبة) ..حطت هالشرانق وفرجتن لﻹمبراطور وصارت تلعب فيهن وبالصدفة وقعت شرنقة بالماء الساخن تبع الشاي فلاحظت خيط عنكبوتي عم يتشابك و ينفصل من الشرنقة..فقامت وبالصدفة سحبت الخيط من الشرنقة اللي بطاسة الشاي .. فاكتشفت بذكائها انو الخيط الرفيع عم يتفكك من الشرنقة ..وبهالنتيجة اللي حصلت عليها فورا طلبت من اﻹمبراطور يخصصلا مساحة من اﻷرض المزروعة بشجر التوت لحتى تربي اﻷلاف من ديدان القز ..
وبيقولوا بكفاية الحكاية انها هي اللي اخترعت بكرات لف وغزل الحرير…منشان تجمع خيوط الحرير الرفيعة مع بعضها لتصير سميكة وقوية منشان تستخدمها بأعمال الغزل والنسيج…
طبعا ما حدا من المؤرخين قدر يأكد ويثبت صحة هالحكاية ..بس بيأكدوا انو اكتشاف الحرير وبداية صنعه كان بالصين وكانوا يبادلوه مقايضة مقابل وزنه من اﻷحجار الكريمة…
واسم الحرير بالصينية القديمة شيشو ..واسمه من الصين مرورا بالدول اللي عا طريق الحرير لنوصل على سوريا..: شيشو.. شيروكو..شيلكا.. شوترا.. ابريشم ..ريشم..ريشام..سيلكا ..شيلك. سده..جيبك..ايبك.. بريساما ..شير..شيرا..شيرو
وبسوريا كان اسم الحرير شيرو باﻵكادية وشار بالبابلية.. وشجرة التوت اسمها ايلونو اد توثيه.. ودودة القز اسمها تاولعو اد شيرو.. ونسج =يعني= قز= شرنق ..والنول اسمه ناوله ..وطريق الحرير اسمه داربو اد شيرو..
وفي حكاية تانية بتحكي كيف دخلت صنعة الحرير عا منطقتنا على أساس انو ماكانت موجودة … قال بعام 550 ميلادي اﻹمبراطور البيزنطي جوستنيان اعترض على دفع مبالغ باهظة للفرس ﻹحتكارن تجارة الحرير ..ففكر بانو يوصل على الصين من طريق ما بيمر من بلاد فارس..لكنو ما نجح.. قام أرسل راهبين عالصين .. تمكنوا من إخفاء بيوض لدود القز وبذور لشجر التوت داخل عصى مجوفة (قصبة) وقدروا يهربوها ويجيبوها عالقسطنطينية (اسطنبول) فانتشرت هالصنعة بحوض المتوسط واليونان وايطاليا وولبنان وفلسطين والعراق ومصر ودخلت سوريا عن طريق بصرى الشام وبصرا الحرير ودمشق…وكانت مشتى الحلو ودير ماما من أهم المراكز ﻹنتاج الحرير..
هيدا المعروف والمتداول والمنتشر عنا وبالعالم عن الحرير..
طيب وهﻷ رح احكي حكايات صغيري كتير عن الحرير من عنا من تراثنا اللامادي من آلاف السنين ..اسمعوا :
قبل كلشي موطن شجرة التوت اﻷصلي هو غرب آسيا وخاصة بلاد الشام وهو شجر معمر وكان موجود بكثافة وبأنواع عديدة ..طبعا لجانب أشجار البطم والبلوط والنارنج والبرتقال..وكلن بتتغذى على أوراقن دودة القز ..وعافكرة ..الصمغ اللي بتفرزه دودة الحرير من مغازلها الستة لمن بتعمل الشرنقة اسمه صمغ السيريسين (من اسم سيريا ..ﻷن أنا ودودة القز عنا شوفينية سورية زايدة عن حدا …هههه )
من أكتر من 4500 ق.م وجدت معامل للنسيج واشتهرت بالعالم القديم باسم مشاغل بيت الصوف بأوغاريت وايبلا وماري وبابل..وانو اختراع النول والدولاب والمغزل كانت موجودة من هالتاريخ..
_ ماري تل الحرير( تلو اد شيرو) ..من 3000 ق.م كانت مشهورة بصناعة اﻷقمشة الحريرية الموشاة بخيوط الدهب..وباﻷدب الشعبي بماري بتتذكروا حكاية نساجة ماري نوراما وصديقتها خابشيرا..(حكيتلكن اياها)
_ابلا (تل مرديخ) من 3500 ق.م كانت مشهورة بقماش اسمه القماش اﻹبلاوي (متل البروكار الدمشقي المشهورة فيه دمشق) وهو مزيج من خيوط الكتان والصوف والحرير ومزين بالدهب والفضة
_بابل ..من اكتر من 3000 ق.م كانت عاصمة الموضة متل باريس وميلانو عا أيامنا..وباﻷدب البابلي حكاية مشهورة هي اقدم قصة حب اسمها بيرام وتشبي و شجرة التوت اﻷحمر..ومذكور شال الحرير اللي أهداه بيرام لتشبي (حكيتلكن عنها)..
_بتدمر من اﻷلف اﻷول ق.م. وجدت أقمشة من الحرير الطبيعي بمقابر تدمر ملفوفة فيها المومياءات التدمرية …ووجدت كمان قطع من أقمشة صوفية وحريرية بأحد المقابر البرجية بترجع للقرن التالت ق.م…
منجي على اسماء الحرير حسب سماكة الخيط وكلها اسماء سورية وهي الدامسكو ..اﻹستبرق..السندس..الديباج..الدمسق ..البروكار
منجي عالصباغ اﻷرجواني اللي اخترعوه الفينيقيين الكنعانيين ونقلوه لكل بلاد العالم واللي استخدموه بصباغة الحرير..
منجي لبعض اسماء المناطق والضيع والمدن متل تلو اد شيرو (تل الحرير)..منبج كان اسمها مدينة الحرير…وفي كمان بصرا الحرير .. ضهرو ابشيرو..تل الشير ..نبع الشير. ..وغيرها كتير من اﻷسماء الموجود فيها اسم الحرير قبل تاريخ طاسة الشاي تبعت زيليتش مرت اﻹمبراطور الصيني…
أما الرسومات والزخارف على الحرير فكانت كلها مستوحاة من الحياة اليومية والبيئة والطبيعة السورية..متل اﻷزهار والطيور..طيور الحب عاشق معشوق ..بيرام وتشبي أو روميو وجولييت ..اللوز والبندق والورود الصغيرة ..مشاهد صيد الغزلان ..ومشاهد رقص الحوريات ..رسوم فرسان وصيادين واشجار ونباتات وثمار..والوردة السباعية ..وعريشة العنب ..وصور لحالات القمر.
هﻷ هيدي الحكاية الصينية عن اكتشاف الحرير المشهورة بالعالم ..وهيدي حكايات عن الحرير بمنطقتنا اللي بيتجاهلها العالم…
لكن خلال بحثي عن موضوع الحرير لقيت انو في شي أقدم تاريخيا عن اكتشاف الحرير موجود بمنطقتنا من الاف السنين وحتى العصور الحديثة (يعني ما منسى حادثة طوشة ال 1840_1860 واللي كان السبب الرئيسي فيها هو الحرير ..لمن صاب المرض اشجار التوت وانضربت صنعة الحرير بكل دول العالم ماعدا سوريا ولبنان فعملوا الفرنساوية والبريطانية والعثمانيين فتنة دموية كبيرة ليسيطروا ويدمروا صناعة وزراعة الحرير بمنطقتنا واللي كان اهم السلع اﻹقتصادية بهداك الزمن)..
يعني في تغييب حقيقي و ومجحف بحق كل ماهو موجود ببلادنا ..فبتمنى على كل المؤرخين والباحثين بهاد المجال يسعوا ﻹظهار التاريخ الحقيقي للحرير بسوريا ….وحييتوا يا سوريين …وتحيا سوريا….