العيب والعيبة وعلى الأصل دور و من صفحة المهندس الفنان على شبانة.
* زمان ؛ كان فيه حاجه اسمها عيب وميصحش واحترام متبادل بين الناس
🌹 حدانا في البلد …
كانت أي زوجه تقول لأخو زوجها يا عم حتى لو أصغر منها ب 20 سنه , أما أخت الزوج كانت اسمها عمّه , ده لا قهر ولا استعباد , دي موده ومحبه .
💐 حدانا في البلد …
كان أي راجل بشنب ملو هدومه يقول لأي ست أكبر منه يا خاله حتى لو ماتقربلهوش خاله فلانه .. لو كان عندها ألف فدان يقول لها يا خاله .. ولو بتبيع جرجير قدام الجامع يقول لها يا خاله .
💐 حدانا في البلد …
كان العم بيتقال له أبوك فلان , وهات كذا من بيت أبوك فلان , اللي هو عمك , والجد بيتقال له سيدي فلان .. وأي راجل عجوز بيتقال له يا سيدي
💐 حدانا في البلد …
كان الإبن حتى لو كان أستاذ في الجامعه يبوس إيد أبوه و أمه وعمه الكبير وخالته الكبيره , يوطي ويبوس ضهر إيدهم مش يبوس خدهم .
💐 حدانا في البلد …
كان لو حد تعب البلد تتقلب , ولو حد مات كله يعزي ويجهز أكل للضيوف اللي جايين يعزو من بره البلد ( كل بيت يجهز أكل ) , وفي الفرح كله يحضر من غير كارت دعوه , من غير قاعه , البلد بتبقى هي القاعه …
💐حدانا في البلد …
كان في ناس بتصحى من الفجر تركّب العده عالحمار وتعلّقه في العربيه الكارو وتربط البهايم في العربيه من ورا وصوت ماكينات الري يظهر مع أدان الديوك , وأرض عطشانه بتشرب وعصافير بتسبح ربنا .
💐 حدانا في البلد …
كنت لو ماشي وشايل حاجه بتتاكل جايبها من الارض لازم تعزم عالناس اللي بتقابلك , خد لك شوية بصل أخضر لسه بطينهم أهم , خدي لك كرنبه يا خاله .
💐 حدانا في البلد …
كانت الناس بتنام بعد العشا , إيديهم خشنه ومشققه , بينامو مهدودين ومبتسمين , لا سمعو عن أمراض نفسي ولا المهدئات ولا لعنو الظروف ولا الدكتور قال لهم محتاجين تطلعو شرم أسبوع عشان تغيرو جو .
💐 حدانا في البلد ….
كانت الضحكه بتطلع من القلب والكلام كان حلو : صباحك نادي , خلّي عنك , العوافي , من يد ما نعدمهاش .
💐 حدانا في البلد …
في طرمبة ميه عمرها أكبر من عمر بعض الدول وشجرة عمرها أكبر من عمر أمريكا .
💐 حدانا في البلد …
وشوش بتعرف تبتسم وناس عواجيز في ملامحهم خريطة بلد , وعيال صغيره بتاخد الحكمه والفلسفه من القاعده مع الاجداد ( لما بيقعد مع سيده ) , مش من كتب ( الخواجات ) .
💐 كان حدانا في البلد …
أدب وخجل وتوقير للكبير …
